في أكلة كتيربحبها اسمها (مشاط)، ما بعرف ازا بتعرفوها بس هيه عبارة عن زهرة مسلوقة شوي بتنحط بعجينة من البيض والبهارات والطحين والبقدونس والبصل وبعدين بتنقلى.... يييييمميييي كتير بتشهي.
وبما انني ماشية على حمية الكيتو والمشاط جايين على بالي، قررت أعدل الوصفة لحتى اتناسبني. فكان لازم أعملها بدون طحين وهيك ما رح تمسك الخلطة عل الزهرة، واخر شي طلعت بهاي الوصفة.
سلقت الزهرة تلات ارباع سلقة وصفيتها وقطعتها زغير وعملت خلطة البيض، في صحن كبير حطيت 3 بيضات وخفقتهم وقطعت بصلة زغير وحطيتها عل البيض وكمان تقريباُ نص كاسة من البقدونس المفروم.
وبعدين حطيت البهارات: ملح وفلفل أسود وكركم و كزبرة ناشفة وكاري وشوية فانيلا عشان بخاف من الزنخة، وخلطت كلشي سوا وحطيت الزهرة معهم.
وبمقلاية حطيت شوية زيت وسخنتو وحطيت جزء من الخلطة على شكل قرص أو دائرة لحتى تتحمر وبنقلبها على الجهة التانية عشان انحمرها.
بتتاكل وهيه سخنة أزكى.
ويا ريتو صحتين!
المكونات
1/2 راس زهرة
3 بيض
1 بصل وسط
1/2 كاسة بقدونس مفروم
3/4 معلقة صغيرة ملح
1/2 معلقة صغيرة فلفل أسود
1/2 معلقة صغيرة كركم
3/4 معلقة صغيرة كزبرة ناشفة
-- كري حسب الرغبة
-- رشة فانيلا
الطريقة
- بنقطع الزهرة وبنسلقها وبنصفيها وبنقطعها لقطع زغيرة وبنحطها بصحن كبير
- وبنحط البيض والبصل والبقدونس وباقي المكونات والبهارات وبنخلطهم
- بنسخن مقلاية فيها زيت عل النار
- وبنحط شوية من الخلطة على شكل دائرة زغيرة لحتى تتحمر وبنقلبها وبنحمر الجهة التانية
- وبتنحط بصحن التقديم وبتتاكل سخنة
ويا ريتو صحتين!
ليست هناك تعليقات:
إرسال تعليق