مافي أزكى من البيتزا بكل أنواعها و أشكالها، واليوم اتحول حلمي لحقيقة. وعملت بيتزا بتشههي بدون طحين وقليلة الكربوهيدرات وكيتو وبدون غلوتين ونفس طعمة البيتزا الأصلية وكمان كتير سهلة وسريعة.
بدنا بس 3 مكونات لنعمل العجينة اللي تحت - صدر دجاج وبيضة وجبنة موتزاريلا. وصفة غريبة صح! بس صدقوني رح اتحبوها كتير وتستمتعوا بأكلها. وبتقدرو اتحطو عليها من فوق الأشياء اللي بتحبوها، خضار زي - البصل، البندورة، فلفل حلو، كوسى، مشروم، زيتون، لحوم زي - ببروني، هوت دوغ، لحمة مفرومة، جبنة.
بهاي الوصفة السهلة بنفرم صدر الجاجة على محضرة الطعام وبنخلطها مع جبنة موتزاريلا وبيضة مع رشة ملح وفلفل. وبنفردها بالصينية على ورق زبدة (ريحي حالك من شوية جلي) وخليها رقيقة على قد ما بتقدري، بنشويها شوي وبعدين منحط الأشياء اللي فوق، هون استعملت شوية رب بندورة وزعتر ناشف وبصل وزيتون وفليفلة ومشروم وجبنة. وبرجعها عل الفرن شوي وبعدين بحمرها.
وانسيت احكيلكم انها بتشبع كتير كمان!
ويا ريتو صحتين!
المكونات
للعجينة
1 صدر دجاجة
1 بيضة
1/4 كاسة جبنة موتزاريلا مبروشة
--- رشة ملح
--- رشة فلفل
للأشياء اللي فوق
1 ملعقة زغيرة رب بندورة
-- رشة زعتر ناشف
-- بصل مقطع شرائح
-- زيتون
-- فلفل حلو مقطع
-- بندورة مقطعة مكعبات
-- مشروم مقطع
-- جبنة موتزاريلا مبشورة
الطريقة
- بنحط صدر الجاجة في محضرة الطعام وبنفرمو كتير ناعم
- بنحط الجاجة في صحن كبير شوي وبنحط معها 1/4 كاسة الموتزاريلا وبيضة ورشة ملح وفلفل وبنخلطهم منيح
- بنجيب صينية وبنحط فيها ورقة زبدة على قدها
- بنفرد عجينة الجاج بالايد أو بشوكة أو معلقة على شكل دائرة وبنخليها رقيقة
- بندخلها الفرن على حرارة 200 لمدة 10 دقايق
- بنطلعها من الفرن -هون لونها بكون اتغير للأبيض
- بنجيب ورق المطبخ اللي بنشف وبننشف وجه عجينة البيتزا من أي سوائل
- بندهن وجهها برب البندورة وبنرش شوية زعتر ناشف
- وبنحط باقي الخضار وبنرش الجبنة عل الوجه وبنرجعها عل الفرن كمان 6 دقايق
- واخر شي بنحمرها
- وبنقطعها وبنقدمها
ويا ريتو صحتين!
