بان كيك قليل الكربوهيدرات خالي من الغلوتين (كيتو بان كيك)
ما في اشي ازكى من البان كيك عل الفطور. عشان هيك كان لازم الاقي وصفة للبان كيك قليلة بالكربوهيدرات اتناسب اللي عاملين كيتو دايت واللي منهم أنا واللي بعانو من حساسية الغلوتين. هاي الوصفة كتير سهلة وكتير زاكية رح اتحبوها.
استخدمت بالوصفة طحين اللوز لأننو الكربوهيدرات فيه قليلة وطعمو زاكي وبعطي الملمس المطلوب للبان كيك.
أنا استخدمت بهاي الوصفة لوز كامل مع قشرتو حتى أستفيد من الألياف اللي بالقشرة وطحنتهم على محضرة الطعام، بس لازم ننتبه اننو ما نطحنهم كتير لحتى ما يتحول عنا طحين اللوز لزبدة اللوز.
لتحضير البان كيك ما رح ياخد منك الا اكمن دقيقة، بتتسخن الجبنة نقطة وبتنخلط مع باقي المكونات، وبعدين بنعملو زي البان كيك العادي، بتتسخن المقلاية مع شوية زبدة وبنحط خلطة البان كيك دوائر زغيرة لحتى تتحمر وبنقلبها عل الجهة التانية.
مافي أسهل من هيك!
ويا ريتو صحتين!
ويا ريتو صحتين!
المكونات
3 حبات جبنة كيري
2 بيض كبار
1/2 كاسة طحين لوز
1/4 كاسة كريمة طبخ
1/2 ملعقة صغيرة فانيلا
1 ملعقة صغيرة بيكنج باودر
2 مغلفين سكرين أو ستيفيا أو سبلندا
الطريقة
- بنحط الجبنة بصحن كبير شوي بالمايكرويف تقريباً 15 ثانية لحتى اتسيح شوي ونقدر نخلطها بسهولة مع باقي المكونات
- بنخلط الجبنة مع كريمة الطبخ والبيض بخلاط الكيك الكهربائي
- ثم نضيف باقي المكونات ونخلط
- بنسخن مقلاية وبنحط فيها شوية زبدة
- بنسكب خليط البان كيك بشكل دوائر صغيرة* لحتى تتحمر وبنقلبها على الجهة التانية لتتحمر
- بنحط البان كيك على صحن التقديم وأزكى شي تتاكل دافية مع زبدة و شوية سيرب (طبعاً يكون خالي من السكر ازا متبعين حمية الكيتو
* لازم الدوائر اتكون زغيرة لحتى نقدر نقلبها بسهولة، يعني يكون قطرها مش أكتر من 3 انش
ويا ريتو صحتين!
ويا ريتو صحتين!
